BUOD NG INTRAMS 2016

Ika-25 ng Hulyo, naganap ang ADZU Intramurals 2016. Pinangunahan ni Fr. Stephen T. Abuan, SJ ang pagsisimula ng Intamurals 2016. Sinundan ito ng lighting of the torch, panunumpa ng mga manlalaro at pagalsa ng mga banners ng bawat klase. Makikita ang kasiyahan at kasabikan sa mga mukha ng mga mag-aaral. 

Mga nakabibinging hiyawan at sigawan ng mga mag-aaral ang nangingibabaw sa bulwagan. Lahat ay sabik sa mga kompetisyong magaganap kung saan mapapakita nila ang kanilang mga talento at galing. Sa unang araw, nagpakitang gilas ang mga mag-aaral ng bawat baitang sa Pop Dance. Lahat ng nagtanghal ay nakamamangha at masasabing naghanda ng mabuti.

Sa huli, tinanghal na panalo ang The Premiers, ika-sampung baitang. Sa unang araw rin naganap ang nakatataas balahibong paligsahan sa pag-awit. Ang bawat birit sa duet at solo competition ay talagang nakabibilib. Nagwagi ang Baitang 9 sa duet at solo competition.

Pagkatapos nito, sinimulan na rin ang mga laro at paligsahan. Palaban ang mga mag-aaral, lahat ay gustong makamit ang titulong overall champion para sa kanilang batch. Determinado ang bawat manlalaro na manalo sa kanilang mga laro. Ginawa nila ang lahat ng kanilang makakaya para sa bawat kompetisyon. Sa huling araw ginanap ang huling paligsahan ng Intramurals 2016, ang cheerdance competition.

Sa lower category, ang Green Buddies laban sa Red Crusaders kung saan nanalo ang Green Buddies. Sa upper category naman, ang Yellow Army laban sa The Premiers kung saan nanalo ang Yellow Army. Pagkatapos ng cheerdance ay binigay ang parangal sa mga manlalarong nagpakitang gilas sa iba’t ibang isports. Matapos ibigay ang mga parangal ay iginawad na ang pinaka-inaabangan ng lahat- ang malaman kung sino ang overall champion sa taong ito.

Nagwala at naghiyawan ang The Premiers nang tinanghal silang overall champion. Dahil sa kagalakan, dinumog ng baitang 10 ang bulwagan.

Makikita ngayong Intamurals 2016 ang pagkakaisa ng bawat mag-aaral para maitaas ang bandila ng kanilang baitang. Mula sa masayahing Green Buddies, aktibong Red Crusaders, palabang Yellow Army at todo-bigay na The Premiers, pinatunayang ito ay isang hindi makakalimutang Intrams lalong-lalo na sa Baitang 10 dahil ito na ang kanilang huling Intramurals sa Junior High School. 

Ni: Princess Marizhar Omar

Larawang kuha nina: Jim Alfraro, Meg Gerodias, Mark Palileo, Daren Sia, Christine Allazas, Zeirahma Abdulhasad, Rain Hadjirul, Claire Catadman.